Dopalo me tako jedanput, ka san tek vazeja novi motor i vraća se sa banji na Čiovo, da se vizavi Garifulina makinja udune. A ča je? Ni se ni steplija, a već zajebaje... Ali, povirin u rezervar, kad tamo suvo ka prga. Bi mi je, srića, brat tot blizu u Lubinski porat, pa san ga dozva da mi zaja po litre da mogu s miron akoštat.
Ista trapula
Govori mi na to posli moj susid u lučicu šjor File sa škal ka fiškal: “Zvizdunu, vazmeš kantu o’ pet litar benzine i tiščiš je u brod za rizervu i zaudobiš na nju.” Je, čovik me lipo svitova i tako i dan danas učinen. Mene je svitova, ma sebe ni, jerbo je poza par dan upa u istu trapulu.
Odija je sa ženon učinit banj i ubrat malo pizdic, ka’ isprid Ben motor izduši. Nafte ni za lik, samo je arju povuka. E sad, ako koga zove,...