Okad je mandrača na Matejušku i famija barba Ante u nj tišći barku. I pradida i dida i ćaća bili su ribari, jemali pravu starinsku gajetu i malu batelinu za lagje artima upravit, to oće reć mriže i parangale skalavat.
Ante je svršija za maranguna, radija u poduzeće, a od pozapodne faturetava pa je na ribe odija samo zaraj gušta, švoga kako bi sam reka. Gajetu su davno prodali na Hvar, eno još i danas primordernana liti turiste điraje, a batelinu je Ante ostavija za svoje potribe, ali i na uspomenu na svoje stare.
Čekaj ma za koje potribe? Pa za uvatit šaku friški giric oli špari za marendin jerbo je najslaje ka’ sam uloviš, a ka’ drugo i ono glavno za kavadinu. Kavadina je izgovor za pobić vanka kuće i na šentadu u Matejušku parlat o’pulitici, o’Ajduku i...