Salam 20 (19)
1Na svrhu. Salam ol Davida.
2Udovoji ti je Gospodar u dnev ol dišperacijuna;
zašćitilo te je ime Boga ol Jake.
3Posla je tebi ajutacijun iž Kapele,
i iž Sijuna obrani je tebe.
4Spomenu se je svih posvetilišćih tvojih,
i žrtvovanje tvoje tustin se učinilo.
5Dâ ti je naprama srcu tvojemu,
i posvidoči je sve pensire tvoje.
6Diletat ćemo se u šalvanju tvojemu;
i uzveličat ćemo se u imenu Boga našega.
7Ispuni je Gospodar sva išćanja tvoja;
sadar nadazdrijen kako je šalvanin učini Gospodar krsta svojega.
Udovoji mu je s nebes ol šantih svojih,
su moćjon ol desne šalva je njega.
8Vi na kariman, vi na konjiman;
mi sami ime ol Gospodara Boga našega zazivat ćemo.
9Nî su se zauzlali, i zabrusili su;
mi sami poldigli smo se, i uspijentani smo.
10Gospodaru, šalvanin učin kraja,
i udovoj nan u dnev u ki budemo zazvali tebe.
Salam 21 (20)
1Na svrhu. Salam ol Davida.
2Gospodaru, u kriposti tvojon kraj će se diletat,
i nada šalvanjen tvojin vele će se sulacat.
3Hotinje ol srca njegovega dâ si njemu,
i nis mu prikrati voju ol pešanj njegovih.
4Jerbo si ga priteka u slalkiman blagosloviman;
metnu si na glavu njegovu krunu ol dragega kamenja.
5Život je moli ol tebe, i dâ si mu dujinu ol dnevih
zanavik, po sve vike vikov.
6Vela je glorija njegova u šalvanju tvojemu;
gloriju i velu lipotu metnu si nada nje.
7Jerbo ćeš mu dat blagoslov u vike vikov;
razveselit ćeš ga su alegrijon od lica tvojega.
8Jerbo se kraj ufa u Gospodara,
i po samaritanšćini Višnjega neće se izneblušit.
9Našla je ruka tvoja sve dušmane tvoje;
desna tvoja nać će sve ki te nenavididu.
10Metnut ćeš njih kako peć ognjenu u vrime lica tvojega:
izneblušit će jih Gospodar u bisu svojemu,
i požerat će jih oganj.
11Frut njihov iž zemje ćeš istribit,
i sime njihovo ol sinov čovičanskih,
12jerbo su navalili na te zlega;
namislili su vića ča jih nisu mogli štabilat.
13Jerbo ćeš jih metnut na škinu;
u retajiman tvojiman parićat ćeš lice njihovo.
14Podišaj se, Gospodaru, u kriposti tvojon;
pivat ćemo i kumpanjajuć kantat kriposti tvoje.
Salam 22 (21)
1Na svrhu, za primanje izjutra. Salam ol Davida.
2Bože, Bože moj, ošervaj se na me: zarad česa si me obanduna?
lontunane su ol šalvanja moga beside sagrišenja mojega.
3Bože moj, vapijat ću obdan, i nećeš mi udovojit;
i obnoć, ma mi to ni za ludoriju.
4Ti sâm u nen šantožen živeš, falo od Irajila.
5U te su se ufale ćaće naše;
ufale su se, i delibera si jih.
6Ki tebi su vapili, i šalvaniman su učinjeni;
u te su se ufali, i nisu se zaružili.
7Ja sam san črv, a ne čejade;
rugo judiman, i škart puciman.
8Svi ki me vididu rugadu se meni;
mažinadu pešnjan i vrtejadu glavon.
9Ufa se je u Gospodara, neka ga škapula:
šalvanin neka ga učini, jerbo jubi njega.
10Jerbo si ti ni ki me je iž droba izvadi,
ufanje moje ol sis matere moje.
11U te san bi zahićen iž maternice;
ol droba matere moje Bog moj jes ti;
12nemoj se lontunat ol mene,
jerbo je dišperacijun blizu,
jerbo ni koga za ajutacijun.
13Zapasali su mene telići pusti;
tusti voli okružili su mene.
14Otvorili su nada menon justa svoja,
kako lijun ćapavajuć i rujuć.
15Kako voda proli san se,
i rastrkano je svo košće moje.
Učinilo se je srce moje koda čerešpanja
kraveć se u sri sride ol droba mojega.
16Ošušila se koda matun kripost moja,
i jazik moj prilipi mi se je za gućan,
i u prah ol smrti dove si mene.
17Jerbo su me zapasali pasi pusti;
viće ol nih pokvarenih okružilo je mene.
Pobili su moje ruke i noge moje,
18izbrojili su svo košće moje.
Nî sami košiderali su i razgledali mene.
19Razdilili su meju sobon odiću moju,
i nada vešton mojon metnuli su ždribe.
20Ti sâm, Gospodaru, nemoj lontunat ajutacijun tvoj ol mene;
na obranjenje moje pogledaj.
21Škapulaj ol sabje, Bože, anim moj,
i ol ruke kućina jedinicu moju.
22Ol žval od lijuna me šalvaj,
i ol rozih jelnorozih injoracijun moj.
23Pravjat ću obo imenu tvojen braći mojon;
u sri sride ol crikve falit ću tebe.
24Ki jemate prpe pril Gospodaron, falte ga;
svo sime ol Jake, glorijajte ga.
25Neka se svo sime od Israjila boji njega,
jerbo ni pokara, niti je poruži pomoljenje ol
siromahov,
ni obrnu obraz svoj ol mene,
i kal san zazva njega, udovoji je meni.
26U tebe je fala moja u crikvi velon;
zavite moje olvratit ću prid obrazon usprpanih pril njin.
27Jist ćedu siromasi, i nasitit ćedu se;
i falit ćedu Gospodara ki išćedu njega;
živit će srce njihovo u vike vikov.
28Spomenut ćedu se i obrnut ćedu se Gospodaru cili konfini ol zemje;
i klanjat ćedu se prid obrazon njegovin sve fameje puške;
29jerbo je ol Gospodara krajestvo,
i on sam guvernat će pukon.
30Manjat ćedu i klanjat ćedu se svi tusti ol zemje;
prid obrazon njegovin past ćedu svi ki se skalajedu u zemju.
31I anim moj živit će njemu;
i sime moje bit će mu šervicij.
32Obznanit će se Gospodaru porod dohodeći;
i obznanit ćedu nebesa pošćenje njegovo
puku ča će se rodit, ča ga je učini Gospodar.
Salam 23 (22)
1Salam ol Davida.
Gospodar guverna mene, i ničesa mi neće pofalit:
2nonde na mistu ol paše on me je namisti.
Nada vodon ol pokripjenja izve je mene,
3anim je moj priobrnu.
Vodi me je putićiman ol pošćenja,
zarad imena svojega.
4Inšoma, je buden hodit po sri sride ol smrtnega osina,
neću predat pril zlin, jerbo ti su menon si.
Šupružina tvoja, i šćap tvoj,
utišenje su meni.
5Parića si prida obrazon mojin trajtamenat,
kontra niman ča me dišperadu;
pomaza si ujen glavu moju;
i žmul moj opijajući, o kako je prikoviše ćar!
6I samaritanšćina tvoja naslidovat će mene
u sve dneve ol života mojega;
i da stojin u kući ol Gospodara,
u dujini ol dnevih.
Salam 24 (23)
1Na prvi ol subote. Salam ol Davida.
Zemja je ol Gospodara, i punoća njezina;
balota zemajska, i sve ča žive na njon.
2Jerbo je on nada moren fundamenta njega,
i nada rikan parića ga je.
3Ko će se uspet na goru ol Gospodara?
oli ko će stat na mistu šantožen njegoven?
4Nî brezgrišnih ruk i nî puliškanega srca,
ki nĩ vaze u sagrišenje anim svoj,
niti se je zakunu u himbi bližnjen svojen.
5Vi ćedu primit blagoslov ol Gospodara,
i samaritanšćinu ȍl Boga šalvadura svojega.
6Vo je porod ča išće njega,
ča išće obraz Boga ol Jake.
7Išajte vrata vaša, glavari,
i dignite se, vrata vikovišnja,
i ulist će kraj ol glorije.
8Ko je ti kraj ol glorije?
Gospodar sforcan i mogući,
Gospodar mogući u gveri.
9Išajte vrata vaša, glavari
i dignite se, vrata vikovišnja,
i ulist će kraj ol glorije.
10Ko je ti kraj ol glorije?
Gospodar ol kriposti je tî kraj ol glorije.
(Prijevod na čakavštinu bračkih Selaca: Siniša Vuković prema latinskoj Vulgati)